Şöbə rəhbəri - tibb elmləri namizədi Kərimov Müşfiq İsrafil oğlu, 1969-cu il təvəllüdlü, 1990-cı ildə N.Nərimanov adına Azərbaycan Dövlət Tibb İnstitutunun müalicə-profilaktik fakültəsini fərqlənmə diplomu ilə bitirib. 1990-1992-ci illərdə Azərbaycan Elmi–Tədqiqat Göz Xəstəlikləri İnstitutunda “Göz xəstəlikləri” ixtisası üzrə klinik ordinaturanı keçib. 1996-1999 V.P.Filatov adına Göz Xəstəlikləri və Toxuma Terapiyası institutunda (Odessa şəhəri) əyani aspiranturada təhsil alıb və 1999-cu ildə həmin institutda “Şəkərli diabeti olan xəstələrdə kataraktanın ekstrakapsulyar ekstraksiyası və intraokluyar linzaların implantasiyasından sonra iltihabi reaksiyanın klinik-immunoloji xüsusiyyətləri” mövzusunda namizədlik dissertasiyasını müdafiə edib.

2000-2003-cü illərdə M.İ.Kərimov Səudiyyə Ərəbistanın Məkkə şəhərində “Əl-Nur” Mütəxəssis Xəstəxanasında göz həkimi vəzifəsində çalışıb.

2007-2008-ci illərdə Bremen (Almaniya), Yekaterinburq (Rusiya) və Odessa (Ukrayna) şəhərlərində vitreoretinal cərrahiyyə üzrə hazırlıq keçib, 2007-ci ildən akad. Z.Əliyeva ad. ET göz xəstəlikləri institutda vitreoretinal cərrahiyyə əməliyyatlarını həyata keçirir. Hazırda M.İ.Kərimov gözün ön və arxa seqment xəstəliklərinin cərrahi müalicəsi – kataraktanın fakoemulsifikasiyası, trabekuloektomiya, pars-plana vitrektomiya, skleral sıxılma (bakling), kombinə edilmiş əməliyyatlar (fakoemulsifikasiya və vitrektomiya) kimi əməliyyatlar aparır.

M.İ.Kərimov bir çox beynəlxalq oftalmoloji elmi toplantıların iştirakçısıdır, 20-dən artıq elmi əsərin müəllifidir.