Şamilova Faiqə Hacıbala qızı - gözün zədəsi, plastik və rekonstruktiv cərrahiyyəsi şöbəsinin aparıcı elmi işçisidir.
Prof. K.A.Adıgözəlova-Polçayevanın rəhbərliyi altında o, «Artan və yüksək dərəcəli miopiyada allofassiya və alloskleranın istifadəsi ilə skleroplastik əməliyyatların və revaskulyarizasiya ilə kombinə olunmuş skleroplastikanın müqayisəli təhlili» mövzusunda icra etdiyi dissertasiyasını 1990-cı ildə Tiflis Həkimləri Təkmilləşdirmə institutunda müdafiə edərək, SSRİ AAK tərəfindən tibb elmləri namizədi elmi dərəcəsini almışdır. 1995-ci ildə Azərbaycan Respublikası AAK-nın qərarı ilə baş elmi işçi adına layiq görülmüşdür.
Elmi mövzuların planlaşdırılmasında, qoyulan məsələlərin həllində, alınan nəticələrin işlənməsində və təhlilində yüksək peşəkarlıq nümayiş edir.
O, aşağıda göstərilən mövzuların planlaşdırılmasında və yerinə yetirilməsində məsul icraçılardan biridir:

- «Məktəb yaşlı uşaqlarda yaxındangörmənin patogenezində optik mühitlərinin çatışmamazlığının rolu», 1981-1985-ci illər;
- Şüşəvari cismin müxtəlif patoloji dəyişiklikləri hallarında rekonstruktiv cərrahiyyənin tətbiqi», 1986-1990-cı illər;
- «Göz almasının zədələnmələrində allotransplantatların istifadəsi ilə gözün ön hissəsinin rekonstruktiv cərrahiyyəsi», 1991-1995-ci illər;
- «Gözün optik mühitlərinin xəstəlikləri, immun vəziyyəti və onun korreksiyası», 1996-2000-ci illər;
- «Göz almasının ön hissəsinin və optik mühitlərinin yaşla əlaqədar xəstəliklərinin kliniki-sosial reabilitasiyasının bəzi aspektləri», 2001-2005-ci illər;
- «Gözün ön hissəsinin xəstəliklərinin müasir müalicə üsulları və onların effektivliyinin qiymətləndirilməsi», 2006-2010-cu illər.

O, 93 elmi işin və 3 metodik tövsiyənin müəllifidir. Respublikada və SSRİ-də keçirilən konfrans və qurultayların iştirakçısı olmuşdur.
Şamilova F.H. yüksək səviyyəli oftalmocərrahdır, göz almasının və onun qoruyucu aparatının müxtəlif dərəcəli, xarakterli, lokalizasiyalı yaralanmaları zamanı müasir cərrahi üsulları tətbiq edir, zədələnmələrdən sonra əmələ gələn qüsurları aradan götürmək üçün rekonstruktiv və plastik əməliyyatlar aparır. Eyni zamanda yüksək yaxıngörmədə skleroplastik əməliyyatları yerinə yetirir.
Həkim-internlərin, kliniki ordinatorların, respublikanın müxtəlif rayonlarından gələn həkimlərin təkmilləşdirilməsində fəal iştirak edir.